တက္ကသိုလ် ဆရာ၊ ဆရာမများ၏ သင်ကြား၊သင်ယူမူ စွမ်းဆောင်ရည် ကျွမ်းကျင်မြင့်မား ရေးအတွက် ရည်ရွယ်၍ ရန်ကုန်အရှေ့ပိုင်းတက္ကသိုလ် ဘွဲ့နှင်းသဘင်ခန်းမ၌ (၂၅-၅-၂၀၂၆) ရက်နေ့တွင် Interactive Teaching and Learning in Higher Education ဟောပြောပွဲကို ကျင်းပခဲ့ပါသည်။ အဆိုပါဟောပြောပွဲတွင် ခေတ္တပါမောက္ခချုပ်ဒေါက်တာမျိုးမင်းထွန်းက အဖွင့် အမှာစကား ပြောကြားခဲ့ပြီး ဘူမိဗေဒဌာနမှ ပါမောက္ခ (ဌာနမှူး) ဒေါက်တာအောင်ဇော်မြင့်က ထိ‌ရောက်သော သင်ကြား၊ သင်ယူမူဆိုင်ရာ နည်းစနစ်များအကြောင်း ဟောပြောပို့ချခဲ့ပါသည်။ ရန်ကုန်အရှေ့ပိုင်းတက္ကသိုလ်မှ ဒုတိယပါမောက္ခချုပ်များ၊ သင်ကြား/စီမံ(ဌာနမှူး)များနှင့် ဘာသာရပ်ဌာန(၁၉)ဌာနမှ ဆရာ၊ ဆရာမများ တက်ရောက်ခဲ့ကြပြီး သိရှိလိုသည်များကို အပြန်အလှန်ဆွေးနွေးခဲ့ကြပါသည်။

တက္ကသိုလ်ဆရာ၊ ဆရာမများ၏ သုတေသနစွမ်းဆောင်ရည်မြင့်မားရေးနှင့် အရည်အသွေးမြင့် အသုံးချသုတေသနများ ပေါ်ထွန်းလာစေရေးအတွက် ရည်ရွယ်၍ ရန်ကုန်အရှေ့ပိုင်းတက္ကသိုလ် ဘွဲ့နှင်းသဘင်ခန်းမ၌  (၁၄-၅-၂၀၂၆) ရက်နေ့တွင် သုတေသနလုပ်ထုံးလုပ်နည်းဆိုင်ရာ ဟောပြောပွဲ ကို ကျင်းပခဲ့ပါသည်။ အဆိုပါဟောပြောပွဲတွင် ခေတ္တပါမောက္ခချုပ် ဒေါက်တာမျိုးမင်းထွန်းက အဖွင့် အမှာစကားပြောကြားခဲ့ပြီး မနုဿဗေဒဌာနမှ ပါမောက္ခ (ဌာနမှူး) ဒေါက်တာစန္ဒာအောင်မှ ပညာရပ် ဆိုင်ရာသုတေသန ရေးသားနည်းအကြောင်း ဟောပြောပို့ချခဲ့ပါသည်။ ဒုတိယပါမောက္ခချုပ်များ၊ သင်ကြား/ စီမံ (ဌာနမှူး) များနှင့် ဘာသာရပ်ဌာန (၁၉) ဌာနမှ ဆရာ၊ ဆရာမများ တက်ရောက်ခဲ့ ကြပြီး သိရှိလိုသည်များကို အပြန်အလှန်ဆွေးနွေးခဲ့ကြပါသည်။

(၅-၅-၂၀၂၆)ရက်နေ့တွင် နေပြည်တော်ရှိ Naypyitaw State Academy ၌ ကျင်းပပြုလုပ်သော ၂၀၂၅-၂၀၂၆ ပညာသင်နှစ် လူရည်ချွန်မောင်မယ်များ နိုင်ငံတော်သမ္မတထံမှ ဩဝါဒခံယူပွဲအခမ်းအနားသို့ ရန်ကုန်အရှေ့ပိုင်းတက္ကသိုလ် ခေတ္တပါမောက္ခချုပ် ဒေါက်တာမျိုးမင်းထွန်းနှင့် ရန်ကုန်အရှေ့ပိုင်းတက္ကသိုလ် လူရည်ချွန်များ ဖြစ်သော ပထမနှစ်၊ သင်္ချာ ကျောင်းသား(၁)ဦး၊ ဒုတိယနှစ်၊ အင်္ဂလိပ်စာ ကျောင်းသူ(၁)ဦးနှင့် တာဝန်ရှိ ဆရာ၊ ဆရာမများတက်ရောက်ခဲ့ပါသည်။

ပညာရေးဝန်ကြီးဌာန၊ ပြည်ထောင်စုဝန်ကြီး ဒေါက်တာချောချောစိန်သည် တာဝန်ရှိသူများ နှင့်အတူ (၂-၅-၂၀၂၆)ရက်နေ့ နံနက်ပိုင်းတွင်  ရန်ကုန်အရှေ့ပိုင်းတက္ကသိုလ် အပန်းဖြေရိပ်သာ (Recreation Centre)တည်ဆောက်မည့် မြေနေရာနှင့် ဘွဲ့နှင်းသဘင်တည်ဆောက်ရန် လျာထားသည့် မြေနေရာတို့ကို လာရောက်ကြည့်ရှုစစ်ဆေးရာ ရန်ကုန်အရှေ့ပိုင်းတက္ကသိုလ် ခေတ္တပါမောက္ခချုပ် ဒေါက်တာမျိုးမင်းထွန်း နှင့် တာဝန်ရှိသူများက အဆောက်အအုံ ဆောက်လုပ်မည့် အခြေအနေများကို ရှင်းလင်းတင်ပြခဲ့ပြီး ပြည်ထောင်စုဝန်ကြီးက လိုအပ်သည်များကို မှာကြားခဲ့ပါသည်။

ရန်ကုန်အရှေ့ပိုင်းတက္ကသိုလ် ၂၀၂၄-၂၀၂၅ ပညာသင်နှစ် နှစ်လည်မဂ္ဂဇင်းစာမူရှင် ဂုဏ်ပြုပွဲအခမ်းအနားကို (၇-၄-၂၀၂၆)ရက်နေ့တွင် ရန်ကုန်အရှေ့ပိုင်းတက္ကသိုလ် ဘွဲ့နှင်းသဘင်ခန်းမ၌ ကျင်းပခဲ့ပြီး အဆိုပါ အခမ်းအနားသို့ ခေတ္တပါမောက္ခချုပ်နှင့်တကွ ဒုတိယပါမောက္ခချုပ်များ၊ နှစ်လည်မဂ္ဂဇင်းစာမူရှင်များ၊ ဆရာ၊ ဆရာမများနှင့် ဝန်ထမ်းများတက်ရောက်ခဲ့ကြပါသည်။