ရန်ကုန်အရှေ့ပိုင်းတက္ကသိုလ် (EYU) အမျိုးသားဘောလုံးအသင်း ရန်ကုန်ဇုန်ပြိုင်ပွဲတွင် ချန်ပီယံဆုဖလား ဆွတ်ခူးရရှိခြင်းနှင့် ချန်ပီယံ (EYU) အမျိုးသားဘောလုံးအသင်းအား မှတ်တမ်းတင်ဂုဏ်ပြုပွဲကျင်းပခြင်း

ရန်ကုန်ဇုန်တက္ကသိုလ်များအဆင့် ဘောလုံး၊ ဘော်လီဘောနှင့် ဖူဆယ်ပြိုင်ပွဲများကို ၂၀၂၆ ခုနှစ်၊ ဇွန်လ ၁၃ ရက်နေ့မှ ၁၉ ရက်နေ့အထိ ကျင်းပပြုလုပ်ခဲ့ရာ ရန်ကုန်အရှေ့ပိုင်းတက္ကသိုလ် (EYU)မှ အမျိုးသားဘောလုံးအသင်းနှင့် အမျိုးသားဘော်လီဘောအသင်းတို့ ပါဝင်ယှဉ်ပြိုင်ခဲ့ကြပါသည်။ အဆိုပါပြိုင်ပွဲတွင် ရန်ကုန်အရှေ့ပိုင်းတက္ကသိုလ် အမျိုးသားဘောလုံးအသင်းသည် အဆင့်ဆင့်သော ပွဲစဉ်များတစ်လျှောက် အကောင်းဆုံးခြေစွမ်းပြသကာ အောက်ပါအတိုင်း ပွဲစဉ်အလိုက် အနိုင်ရလဒ်များဖော်ဆောင်နိုင်ခဲ့ပါသည်-
၁၅-၆-၂၀၂၆ ရက်နေ့ (အုပ်စုပွဲစဉ်): EYU အသင်းနှင့် WYU အသင်းတို့ ယှဉ်ပြိုင်ကစားခဲ့ရာ EYU အသင်းက ၅-၃ ရလဒ်ဖြင့် အနိုင်ရရှိခဲ့ပါသည်။
၁၆-၆-၂၀၂၆ ရက်နေ့ (အုပ်စုပွဲစဉ်): EYU အသင်းနှင့် YUEco အသင်းတို့ ယှဉ်ပြိုင်ကစားခဲ့ရာ EYU အသင်းက ၂-၁ ရလဒ်ဖြင့် ထပ်မံအနိုင်ရရှိခဲ့ပါသည်။
၁၈-၆-၂၀၂၆ ရက်နေ့ (ဆီမီးဖိုင်နယ်ပွဲစဉ်): အုပ်စု (A) ပထမရ EYU အသင်းနှင့် အုပ်စု (B) ဒုတိယရ YUOE အသင်းတို့ ယှဉ်ပြိုင်ကစားခဲ့ရာ EYU အသင်းက ၃-၂ ရလဒ်ဖြင့် ဗိုလ်လုပွဲသို့ တက်ရောက်နိုင်ခဲ့ပါသည်။
၁၉-၆-၂၀၂၆ ဗိုလ်လုပွဲစဉ် (Final): ဗိုလ်လုပွဲစဉ်တွင် EYU အသင်းနှင့် YU အသင်းတို့ ယှဉ်ပြိုင်ကစားခဲ့ရာ EYU အသင်းက ၄-၃ ရလဒ်ဖြင့် ထိုက်ထိုက်တန်တန် အနိုင်ရရှိကာ ပထမဆုကို ဆွတ်ခူးရရှိခဲ့ပါသည်။
ရန်ကုန်အရှေ့ပိုင်းတက္ကသိုလ် (EYU) အမျိုးသားဘောလုံးအသင်းသည် ပြိုင်ပွဲတစ်လျှောက် ရှုံးပွဲမရှိဘဲ ချန်ပီယံတံခွန်စိုက်ဆုဖလားကို ဆွတ်ခူးရရှိခဲ့ပါသည်။ မိမိတို့တက္ကသိုလ်၏ ဆောင်ပုဒ်ဖြစ်သော “အောင်လံလွှင့်ထူ EYU” နှင့်အညီ ကျောင်းဂုဏ်ဆောင်နိုင်ခဲ့သည့် ချန်ပီယံ EYU ဘောလုံးအသင်းအား ရန်ကုန်အရှေ့ပိုင်းတက္ကသိုလ် မိသားစုတစ်ခုလုံးမှ လှိုက်လှိုက်လှဲလှဲ မှတ်တမ်းတင်ဂုဏ်ပြုအပ်ပါသည်။